«Սիրելի՛ հայրենակիցներ,

Շնորհավորում եմ Անկախության հռչակագրի 32-ամյակի առթիվ:

32 տարի առաջ, 1990թ. օգոստոսի 23-ին Հայաստանի Գերագույն խորհրդի ընդունած Անկախության հռչակագիրն ազդարարեց անկախ պետակա­նության հաստատման գործընթացի սկիզբը:

Այն ազդարարում էր մեր ժողովրդի կյանքում պատմական նոր փուլի սկիզբը՝ հարթելով նոր ու լուսավոր ճանապարհ, դեպի իրական անկախ Հայաստան, դեպի նոր ու լուսավոր պատմություն:

Այսօր մենք անկախ պետություն ենք, որն ունի փորձությամբ ու հաղթանակներով կերտված կենսագրություն, այն շարունակաբար զարգացնող քաղաքացի, այն պաշտպանող բանակ:

Հայաստանի անկախության հռչակագիրը անանց փաստաթուղթ է, որովհետեւ դրանով հռչակված անկախությունն ինքը անանց ու անսակարկելի արժեք է:

Անկախության հռչակագրի տարեդարձը աշխատելու և արարելու, պատասխանատու և կարգապահ լինելու, համախմբված ու համերաշխ, իսկապես ուժեղ երկիր կառուցելու պարտավորեցնող ազդակ է:

Սիրելի՛ հայրենակիցներ, վստահ եմ, որ անցած դժվարին ճանապարհի ձեռքբերումները միասնական ջանքերով կկարողանանք պահպանել, դիմակայել բոլոր մարտահրավերներին ու աներեր կշարունակենք անկախության մեր երթը, հավատարիմ մնալով և պաշտպան լինելով մեր անկախությանը, մեր պետականությանը, մեր ինքնությանը:»

Շնորհավորում եմ բոլորիս օգոստոսի 23-ի կապակցությամբ:»

Տնօրեն՝ Դավիթ Ղուլյան